أكد أحمد حسام ميدو، المدير الفنى السابق لنادى الزمالك، أن قراره الخاص برحيل عبد الواحد السيد حارس مرمى الأبيض السابق اتخذه لمصلحة نادى الزمالك فى المقام الأول.

وقال ميدو فى تصريحات لبرنامج "الملعب" مع الإعلامى أحمد شوبير، "عبد الواحد السيد مينفعش يلعب فى الزمالك السنة الجاية أنا شايف أنه لو كمل فى الكرة مينفعش يكمل فى الزمالك كل اللاعيبه لما بتكبر لازم تلعب فى درجات أقل".

وأضاف، "نفس الكلام بالنسبة لأحمد سمير ومحمود فتح الله رغم إننا عرضنا عليه التجديد، وأنا على سبيل المثال لما لقيت نفسى مش قادر لعبت فى بارنسلى الإنجليزى وبعدين صعبت عليه نفسى إنى بتمرن مع لاعيبه أقل منى وقولت أعتزل أحسن".

وأكد ميدو أن عبد الواحد وفتح الله من أصدقائه المقربين وجلس معهما وأبلغهما بقراره، لأنه لا يتهرب من المسئولية، مضيفاً: "جمهور الزمالك لما يشوف محمد أبو جبل وأحمد الشناوى واقفين فى المرمى السنة الجاية هيبقوا عارفين أن القرار صح، لأن عبد الواحد عنده 37 سنة وفى حاجات كان بيعملها زمان مبقاش قادر يعملها دلوقتى أو بيعملها مش بنفس المستوى".

ونفي ميدو تعرضه لمؤامرة من اللاعبين ليرحل، قائلاً: "مافيش لاعيبه تأمرت عليه لكن اللاعيبه كانت مشتتة بسبب الصفقات الجديدة" مضيفاً: "على سبيل المثال أحمد جعفر لما يلاقى النادى بيمضى خالد قمر وباسم مرسى ووليم جيبور أكيد ده معناه أنه مش هيكون موجود السنة الجاية وأنا كنت متخيل أن اللاعيبه بخبراتهم هيقدروا يقاوموا التشتت لكن للأسف مقدروش يعملوا كده".