الفنانة شيرين عبد الوهاب
تضامن عدد كبير من النجوم لدعم الفنانة شيرين عبد الوهاب ، بسبب أزمتها الأخيرة، التى تعرضت لها بسبب تصريحاتها فى حفل البحرين، والذى اعتبره البعض يمس الأمن القومي، وهو ما نتج عنه منعها من الغناء لحين انتهاء التحقيق معها.
كتب الشاعر الكبير بهاء الدين محمد عبر صفحته في موقع التواصل الاجتماعي فيسبوك "أنا عارف طريقة وتفكير شيرين وواثق إنها مكنتش تقصد بالسجن (سياسة خالص)، وأكبر دليل على إنها لا تملك خبرة التوصيل أو التوضيح إنها مش عارفه لحد النهاردة تقول اللى باقوله ده.. وأقسم بالله إننا لا إتكلمنا ولا شوفنا بعض من سنين".
وأضاف: "المهم ياشيرين أسكتى وغنى بس.. ده أنا اللى الحمدلله أملك أدوات الكلام بكل تمكن مانع نفسى بل رافض تماما أى حوار فى أى جهة إعلامية.. رفض تام لأن دورى أكتب فقط وكلامى هو أنا "وغلط الفنان يتكلم أصلا غير بحساب".
وتابع: "معلش بنت بلدنا وصوت من الأصوات الحلوة اللى بتملكها مصر وماعندناش كتير بلاش نهدها.. وكلنا لينا ناس قريبين مننا لما بييجوا يتكلموا بيبوظوا الدنيا وإحنا قلوب طيبة وجوانا رحمة".
واختتم كلامه بـ"ملحوظة هامة: كلامى مش دفاع ولكن توضيح وماليش أى مصلحة معاها كمطربة لأنى خدت مصلحتى ونجحت مع الكل الحمدلله ومعروف عنى لا بأتقرب لحد ولا باجامل حد ولكن العكس هو الصحيح".
وغرد نيشان عبر حسابه الشخصي بموقع التدوين الاجتماعي تويتر: "سمراءُ النِّيل كَمْ أنتِ مصريَّة".
نشر حسام حبيب عبر حسابه على "إنستجرام" مقطعا للفنانة شيرين وهى تقوم بالغناء لمصر، حيث ظهرت خلاله وهى أكثر اندماجا وهى تغنى لها.
وعلق حبيب "يزايدوا على وطنيتك، بس احساسك ده اغلي من نفاقهم وحقدهم ونفسوهم المريضة، صدقوا مزحتها، وما صدقوش إحساسها وهي بتغني لبلدها.. متضامن مع شيرين عبد الوهاب".
وغردت كارمن عبر حسابها الشخصي بموقع التدوين الاجتماعي قائلة :" شيرين محدش يقدر يشكك في وطنيتها .. شيرين فخر لمصر و كل التعب والشغل اللي عملته بتعمله و هتعمله لمصر برضه، افتكروا الحلو كان قد إيه ربنا يعدي الأزمة دي إن شاء الله".
وقالت سيرين عبد النور : "منحبك ومنعشق صوتك، الله يحميكي ويخلص هل القصة على خير شيرين عبد الوهاب مصر.. متضامنه مع شيرين".
وغردت نانسي عبر حسابها الشخصي بموقع التدوين الاجتماعي تويتر: "شيرين انشالله بترجعي لجمهورك وفنك وتعدي هالأزمة على خير.. كلنا منعرف إنك بتحبي مصر".
ويذكر أن شيرين عبد الوهاب خرجت عن صمتها بعد أزمتها الأخيرة، والتى تعرضت بسببها إلى الوقف عن الغناء بقرار من نقابة المهن الموسيقية.
وقالت شيرين عبد الوهاب عبر حسابها على موقع التواصل الاجتماعى تويتر : " عاوزة أتكلم من قلبي مع كل واحد من أهل بلدي الحبيبة، ومن أهلي وأصدقائي وزملائي؛ اللي قدروا يفهموا ويصدقوا إني لا يمكن أسيء لبلادي اللي أنا كلي من خيرها، ولا يمكن أنكر فضلها عليا، بجد بشكركم وبحبكم، وبعتذر للي أساء فهم كلامي من كل قلبي".
وأضافت شيرين قائلة :"بالنسبة للقنوات المأجورة من خارج مصر، اللي خدت كلامي وخرجته عن سياقه تمامًا وحاولت تستغله ضد بلدي؛ بقولهم إن بلدي خط أحمر، وعمركم ما هتفرقوا بيني وبينها.. أحب أوضح لكل الناس اللي حقهم يعرفوا أن ما كُتب عني في الصحافة ونُسب لي غير صحيح بالمرة، وتقدروا تتحققوا من صحة كلامي من الفيديو الموجود مع إنه ممنتچ عن قصد علشان يطلعني غلطانة".
وأشارت شيرين إلى ما قيل على لسان نقابة الموسيقيين والصحافة إني قلت "أنا هنا أتكلم براحتي عشان اللي بيتكلم في مصر بيتحبس"، وطبعًا ده مش حقيقي، وماقلتهوش، لأن الكلمة بتفرق! .. اللي قلته نصًا وهو موجود بالفيديو "أنا هنا أتكلم براحتي عشان في مصر ممكن يسجنوني" - فيه فرق كبير بين الجملتين! .. أنا كنت بتكلم عن موقف شخصي لما هزرت على المسرح من قبل ورُفعت عليا دعاوى وصدر حكم بسجني سنة وسددت كفالة، واستأنفت واتلغى الحكم في الاستئناف! وبعدين اترفع عليا جنحة مباشرة عن نفس الواقعة، واتحكم فيها بعدم اختصاص القضاء المصري بما وقع في الشارقة؛ هذا ما كنت أقصده والله أعلم بالنوايا .. بحبك يابلدي مهما حصل، ودايمًا #تحيا_مصر".
