مقبرة نفرتاري بالأقصر
أثار سعر تذكرة زيارة مقبرة نفرتاري بالأقصر، والتي تبلغ ألف جنيه للمصريين، حالة من الجدال بين نشطاء مواقع التواصل الاجتماعي "فيس بوك وتويتر"، فالبعض يرى أن قيمة التذكرة مبالغ فيها جدًا، وخاصة للمصريين أهل البلد الذين تطالبهم الحكومة بتنشيط السياحة الداخلية، في حين يري آخرون أن سعر التذكرة عادل، وخاصة أن المقبرة بألوانها ومحتوياتها سليمة ليس بها أية تشوهات.
قال عمر طاهر "مش عارف مين العبقرى صاحب قرار أن تذكرة زيارة مقبرة نفرتارى ألف جنيه؟ يعنى انت مش عارف تتشملل وتجيب سياح تروح مريح كالعادة على واحد واخد عياله الأقصر وطالع بيهم جبل عشان الموظف يقوله 1000 جنيه فيلف ويرجع محرج".
وأوضح طاهر "أفهم أن التذكرة عاملة 50 دولار للخواجة ماشى.. لكن أنا كمصرى إنت فاهم عملت إيه؟ ولا أنتم مش عايزينا ندخل ولا أنتم مجانين ولا إيه حكايتكم؟".
في حين يري ياسر راغب "الواحد لازم يختلف مع الفكر ده حتى لو كان صاحبه عبقري زي عمر طاهر... بالنسبة للأثر ده أثر فريد في العالم ويستحق أكتر والله.... ألوان المقبرة بتتأثر بزيادة الرطوبة (أنفاس وعرق الزائرين) لازم تحدد الأعداد بأي وسيلة..... الزائر كمان عليه مسئولية القراءة عن المكان اللي حيزوره علشان مايتفاجئش he has to do some readings زي ما الأمريكان بيقولوا".
وعلق كريم البحيري "مقبرة نفرتارى الموجودة بوادى الملكات بمدينة الأقصر... أحد أعظم الاكتشافات الحديثة.. وتتكلف زيارة المقبرة 18 ألف جنيه بالإضافة إلى الحصول على تأشيرة زيارة... ويرجع سبب ارتفاع قيمة الزيارة إلى أن المقبرة ما زالت نقوشها سليمة لدرجة أنها توحى بأن نحتها تم أمس... كما أن بها كامل محتويات المقبرة التي لم يتم نقل أي من محتوياتها.
ويرجع سبب عدم نقل محتوياتها إلى انتظار الآثار تقدم العلم ليتم افتتاحها ونقل بعض محتوياتها إلى المتاحف دون الإضرار بأى من نقوشها أو محتوياتها التي لا تقدر بثمن... كما أنه في عهد زاهى حواس رئيس هيئة الآثار الأسبق.. لم يكن يسمح بدخول إلا بعض الأفواج السياحية القليلة... وبتأشيرة خاصة من زاهى حواس شخصيا... وفى أغلب الأحيان كان يصاحب الوفد بنفسه".
وقال أحمد خير الدين "وزير الآثار في اكتر من مكان قال أن ميزانية الوزارة ضعيفة، فطبعا الحل مش إننا نزودها ولا نقنع الحكومة أن الاكتشافات وحماية الآثار والمواقع تستحق فلوس، لا نضاعف التذاكر ونزود تكلفة تصاريح التصوير في الأماكن السياحية، وعلشان تصور صورة بموبايلك في قصر محمد على تدفع خمسين جنيها، وكذلك في كذا مكان، حتى شارع المعز علشان نعمل قرشين حلوين، مع أن نفس الحكومة بتطلب من الناس تنشط السياحة الداخلية وتعوض غياب السياح الأجانب".
وتابع أحمد راجي: "أنا مرة دفعت تيكت مخصوص لمقبرة توت عنخ آمون مش فاكر المبلغ كنت المصري الوحيد ومن غير مرشد سياحي والأحانب بتذاكر زيي ومعاهم مرشد سياحي وبعد خمس دقايق قالولي يلا كفاية".
ورد أحمد عصمت "سؤال بس هي الزيارة ١٠ دقايق بالألف جنيه، يعني الدقيقة ب ١٠٠ جنيه، ليه بصوت شوببر".
