هشام الجخ
قام اثنان من شعراء جماعة الإخوان المسلمين "أحمد والي" و"حسام خميس" بكتابة قصيدتين ردًا على الشاعر هشام الجخ الذي أصدر قصيدة بعنوان "أنا إخوان" والتي يُهاجم فيها الجخ جماعة الإخوان المسلمين ويهاجم فيها الرئيس محمد مرسي .
فقام الشاعر الإخواني خميس بالدفاع عن جماعته وانتمائه وسرد بعض قصص الإخوان مع النظام السابق ومشاركتهم في الحروب، واختتم قصيدته بدعوة الجخ والمصريين بالصلح وبناء مصر .
وإليكم القصيدة :
أنا إخوان..
وكل المسلمين إخوان مقلتش لأ
ومين يقدر يقول على مسلم إنه انشق
ومين يقدر يقول الكل على باطل وهو الحق
*****
أنا إخوان ومن صغري وأنا إخوان
وطول عمري.. رضعت العز من بدري بإيد إخوان
وشايل راسي على كفي عشان ربي، ومش بتهان
لا عمري كنت أنا خاين ولا بايع ولا مجرم ولا سجّان
*****
أنا إخوان وطول عمري ف وقت الخوف أنا الرّبان
وبعد ما أعدّي بحر الصعب أنا بتهان
وأفضل برضه أنا ساكت ومش غلطان
فميجيش "جخ" ويقوللي ده انت جبان
*****
أنا اللي حاربت في فلسطين
وسال دمي بقالوا سنين
وجف الدمع ع الأقصى
وأنا دموعي ليوم الدين
وشقوا صدري بسهامهم
عشان إخوان
*****
برغم الضلمة والعتمة وقفت أثور
وكنتوا تقولوا إخوانجي وعايش الدور
وفاكر إنه هيصلح وطن مكسور
ومسمعتش ف يوم ليكم، فضلت جَسور
عشان إخوان
*****
أنا إخوان ولا ف عمري في يوم وطيت
ولا أكل الرغيف خلّاني جنب الحيط
ولا كان ليّا في الصفقات ولا التزييط
وعشت حياتي وشعاري
أنا إخوان
*****
هتشتم يا هشام اشتم ولا بيهم
وتنطح صخرنا براسك وتنزف دم
ولا هيهزنا شتايمك ولا يغيرنا يوم الذم
ولا هنهتم
*****
مكنتش أحب إني أجاريك ف تخاريفك
ولا إني أسلم يوم بتصنيفك
ده مصري بشرطة وده مصري بدون شرطة
وده يا جخ توصيفك.. مش الإخوان
*****
ولسه برضه ممدوده إيدينا إليك
ففوق واصحى يا ولد العم مد إيديك
عشان نبني وطنا بجد مش تلبيك
وإياك تفتكرني عدو.. ده أنا إخوان
كما قام الشاعر أحمد والى بتسجيل قصيدة بنفس عنوان قصيدة "الجخ" خلال مقطع فيديو بثه عبر موقع اليوتيوب يرد فيها ردًا قاسيًا على قصيدة "أنا إخوان" لهشام الجخ .
